張晨：升職但唔加薪 呢個情況真係哲學級

阿水喺2016年正式升做AM (Assistant Manager)。

咁威，緊係成班聚一聚。飯到尾聲，另一個朋友阿真忍唔住話：

升職加人工，呢餐你請啦。

就喺大家起哄，準備逼阿水就範之際，佢突然講一句：

邊個話升職就等於加人工？

熱唱的歌，忽爾靜了。大家都駁唔到。

的確，喺香港哋聽過唔少「升職唔加薪」嘅Case，仲要唔係一兩次。比較老成嘅Alan就拍拍佢：

唔使灰，可能未搞得切Financial，下個月就加呢。

阿水搖搖頭：

唔係啦，講明加唔到人工住，公司冇Budget。

其實好奇怪，古時嘅論功行賞，就係黃金千兩；今日嘅血汗功勞，就變次次白做。都唔係，應該係你有功勞，即係Fit馬，咁就做多啲。

既然升職，即係認同你實力，要負更多責任。咁酬勞又唔加，即係點呢？

說穿了都係為咗安撫員工，你做得嘢老闆有眼睇，想你Feel到受重視，但同時度縮，唔想貿然加人工。

最好笑係佢勸你接受嗰時會講

升咗Title，做嘢都大聲啲呀。


而家升咗先，即使你第日離職，喺出面嗌價都高啲嘛。


其實公司政策呢，升職同加薪真係分開嘅。


認真嘅，上年個加薪係預埋你而家升職嘅幅度㗎啦。

坦白講，打工搞到好似爭奪皇位咁？升你職仲幫你離職打算埋？

可惜有啲嘢好冇計，阿水話佢嗰間大公司，掉辭職信逼宮又冇100％勝算，正面反抗就實畀人Black List，得返一個Option就係「默然接受」。

表面風光，內心不安，收入繼續同通漲玩遊戲。

阿水之後話當時諗法都係一樣，有得升唔通唔升咩…… 一個人Say No都冇用，唯有拎咗個Title先再算，之後趁冇咩人，行入茶水間Cry in the Pantry。

成件事好現實，好委曲，亦好香港。

原文刊於張晨（鳥不起）facebook，獲作者授權轉載。